Notifications
Clear all

1974 - Engal Kula Deivam - Onnu Vantha Pathathunnu  

  RSS

K.T.RAMANAN
(@k-t-ramanan)
Trusted Member
Joined: 1 year ago
Posts: 82
10/09/2020 5:43 pm  

நாட்டுப்புற பாடல்கள்

பாடல் : ஒண்ணு வந்தா பத்தாதுன்னு ரெண்டு வந்து துள்ளுதிங்கே --- (காட்டு பத்திரி தத்திரி தத்திரி)
படம் : எங்கள் குல தெய்வம்
பாடியவர்கள் : எல்.ஆர்.ஈஸ்வரி, மனோரமா, சாய்பாபா
பாடலாசிரியர் : கண்ணதாசன்
இசை : எம்.எஸ்.விஸ்வநாதன்
வருடம் : 1974

அனைவருக்கும் வணக்கம்.

"பாம்பை" மைய்யமாக வைத்து எடுக்கப்பட்ட படம். இதே போல் "பாம்பை" மைய்யமாக வைத்து தேவர் பிலிம்ஸ் தயாரித்த "வெள்ளிக்கிழமை விரதம்" மிகப்பெரிய வெற்றி பெற்றது. "வெள்ளிக்கிழமை விரதம்"-த்தின் மிகப்பெரிய வெற்றிதான் ஒருவேளை "எங்கள் குல தெய்வம்" படத்தை தயாரிக்க தூண்டுதலாக இருந்திருக்கக்கூடும். ஆனால் "எங்கள் குல தெய்வம்" "வெள்ளிக்கிழமை விரதம்" வெற்றிபெற்ற அளவுக்கு வெற்றிபெறவில்லை. அதே போல் "வெள்ளிக்கிழமை விரதம்" படத்தின் அனைத்து பாடல்களும் மிகப்பெரிய வெற்றி பெற்றிருந்தது. ஆனால் "எங்கள் குல தெய்வம்" படத்தின் "அன்புமிக்க மாப்பிள்ளைக்கு" மற்றும் "காத்திருந்தேன் இந்த வேளை" மட்டும் தான் வெற்றி பெற்றன, அதிலும் "காத்திருந்தேன் இந்த வேளை" சுமார் வெற்றி தான் பெற்றது. இத்தனைக்கும் மற்ற பாடல்கள் மக்கள் மனதை ஈர்க்கக்கூடிய சக்தி இல்லாதவை அல்ல - ஆனால் ஏனோ வரவேற்பு குறைவாக தான் இருந்தன. இந்த பாடலையும் நான் அந்தக்காலத்தில் வானொலியில் கேட்டதே இல்லை (அல்லது ஒளிபரப்பியதை நான் கேட்க தவறியிருக்கலாம்).

எஸ்.வி.சுப்பையா ஒரு பாம்பாட்டி. பலவிதமான நச்சுப்பாம்புகளை தன் குழந்தைகள் போல பராமரித்துவருபவர். அவருக்கு ஒரே மகள் (குழந்தையாக இருக்கும் போது பேபி ஸ்ரீதேவி, வளர்ந்த பிறகு ஜெயசித்ரா). அவரிடம் ஒரு நாள் அந்த ஊர் அம்மன் கோவில் புற்றிலிருந்து ஒரு சிறு நாகம் ஒன்று தானாகவே வந்து சேர்க்கிறது. அவரும் அதை தன் மகனாக பாவித்து வளர்க்கிறார்.

படத்தின் நாயகி கே.ஆர்.விஜயா ஒரு நாகபக்தை. அவர்களது குலதெய்வமே நாகதேவதை தான்.

படத்தின் நாயகன் முத்துராமன் ஒரு துணிக்கடையில் salesman ஆக வேலைபார்க்கிறார். ஒரு நாள் அவரது கடையில் பாம்பு ஒன்று புகுந்துவிட அதை பிடிப்பதற்காக சுப்பையாவை அழைத்து வருகிறார்கள். அவரும் பாம்பை பிடித்துவிடுகிறார். அவரிடம் கடை முதலாளி சேட்டு பாம்புகளை பற்றி வினவ, அவரும் வீட்டுக்கு வாங்க அற்புதமான ஒரு பாம்பு வீட்டில் உள்ளது, அதை காண்பிக்கிறேன் என்கிறார். அது என்னவென்று அறிந்துகொள்ளும் ஆர்வத்துடன் சேட்டும், முத்துராமனும் சுப்பையா குடிசைக்கு போகிறார்கள். அப்போது அவர் இவர்களிடம் அந்த அபூர்வமான நாகத்தை காண்பித்து அதன் மகிமையை விளக்குகிறார் - அது அவரது முப்பாட்டன் காலத்திலிருந்து அவர்கள் குடும்பத்தில் உள்ளது, ஏறத்தாழ முன்னூறு வருடங்களாக. இது நாள் வரை அது யாரையும் சீண்டினது கிடையாது - அப்படி சீண்டாதபடி பார்த்துக்கொண்டு அவர்கள் அதை ஒரு பெட்டிக்குள்ளேயே அடைத்து வளர்க்கிறார்கள். வருடங்கள் போக போக அதன் நீளம் குறைந்து கொண்டே வருகிறது. இன்னும் ஐம்பது-அறுபது வருடங்கள் கடந்தால் அது ஏறத்தாழ ஒரு ஜான் அளவுக்கு வந்துவிடும், அப்போது அதற்க்கு பறக்கும் சக்தி கிடைத்துவிடும். அந்நேரம் அது தன்னுள் இருக்கும் நச்சு நாகரத்தினமாக மாறி அதை அது கக்கி விடும். அந்த நாக ரத்தினம் யாரிடம் இருக்குமோ அவரது காலடியில் இந்த உலகமே விழுந்துவிடும் அளவுக்கு அவர் உயர்ந்த நிலையை அடைவார். ஆனால், அதற்க்கு முன்பே ஏறத்தாழ அந்த நாகரத்தினத்தின் சக்தி கிடைப்பதற்கு ஒரு வழி உள்ளதாகவும், அதற்க்கு அந்த சேட்டு அவரிடம் உள்ள ஒரு வைரக்கல்லை சுப்பையாவிடம் கொடுக்கவேண்டும் என்றும், அதை அவர் ஒரு அமாவாசை அன்று அந்த பாம்பின் நச்சுப்பைக்குள் வைத்து தைத்துவிடுவார் என்றும், அதன் பிறகு அடுத்த அமாவாசை அன்று அந்த ரத்தினத்தை நச்சுப்பையிலிருந்து எடுத்தால் அப்போது அதற்க்கு நாகரத்தினத்திற்குடைய சக்தி கிடைத்திருக்கும் என்றும், அதை சேட்டு ஒரு மோதிரத்தில் வைத்து தன் விரலில் அணிந்துகொண்டால் அவர் தொட்டதெல்லாம் துலங்கும், கைப்பட்டதெல்லாம் விளங்கும் என்கிறார். அதை சேட்டு நம்பினாலும், முதலில் விலைமதிப்புள்ள வைரக்கல்லை சுப்பையாவிடம் கொடுக்க தயங்குகிறார். அதற்க்கு சுப்பையா தான் நேர்மையானவன், சத்தியத்திற்கு கட்டுப்பட்டவன், உங்களுக்கு நம்பிக்கை வரவில்லை என்றால் தான் மகனைப்போல் வளர்க்கும் இந்த நாகத்தின் மேல் ஆணையா சொல்கிறேன் அந்த ரத்தினத்தை நான் மட்டுமல்ல வேறு யார் எடுத்தாலும் அவரை இந்த நாகம் கடித்து கொன்றுவிடும் என்று. சேட்டும் அவரை நம்பி ரத்தினத்தை கொடுக்க, சுப்பையாவும் அதை நாள் பார்த்து அந்த நாகத்தின் நச்சுப்பைக்குள் வைத்து தைத்துவிடுகிறார். ஒரு மாதம் கழித்து அந்த ரத்தினத்தை எடுக்கும் நாளும் வருகிறது. அப்போது முத்துராமன் இரவில் அங்கு வந்து சுப்பையாவையும், ஜெயசித்ராவையும் அடித்துப்போட்டுவிட்டு, அந்த நாகத்தை கொன்று ரத்தினத்தை எடுத்துச்சென்றுவிடுகிறார். இதை பார்த்துக்கொண்டிருக்கும் நாகம் அவரை துரத்துகிறதென்றாலும், அவர் ரயில் ஏறி தப்பித்துச்சென்றுவிடுகிறார்.

தகப்பனை இழந்து நிர்கதியாக நிற்கும் ஜெயசித்ராவை பக்கத்தில் வசிக்கும் மனோரமா-சுருளிராஜன்-தேங்காய் குடும்பம் அவருக்கு ஆறுதல் சொல்லி, தங்களுடன் அழைத்துச்செல்கிறார்கள். அவர்கள் கழைக்கூத்தாடிகள். சாலைகளில் ஆடிப்பாடி, வித்தைகள் காட்டி பிழைப்பவர்கள். அவர்களோடு ஆடிப்பாடி இருந்தால் கொஞ்சம் ஆறுதலாக இருக்கும் என்று ஜெயசித்ராவிற்கு எடுத்துரைக்கிறார். அவரும் அப்படியே செய்கிறார். ஆனால் அவருக்குள் ஒரு நெருப்பு புகைந்துகொண்டே இருக்கிறது - அது என்னவென்றால் - தங்களுக்கு துரோகம் செய்து, தகப்பனையும் கொன்றுவிட்டு போன அந்த துரோகியை கண்டுபிடித்து பழிக்கு பழி வாங்கவேண்டும் என்பது. அந்த கயவனை நேரில் பார்த்துள்ள அந்த நாகத்தின் வாயிலாக தன் இலட்சியத்தை நிறைவேற்றவும் அவர் துடிக்கிறார்.

அங்கு, முத்துராமன் அந்த ரத்தினத்தின் சிறப்பால் பெரிய செல்வந்தர் ஆகிவிடுகிறார். அவருக்கும் கே.ஆர்.விஜயாவிற்கும் திருமணம் நடக்கிறது. ஜெயசித்ராவிற்கு காவலாக நிற்கும் அந்த பழிவாங்க துடிக்கும் நாகம் முத்துராமனை தேடிப்பிடித்து முதல் இரவு அறைக்குள் புகுந்துவிடுகிறது. அதைக்கண்டு திடுக்கிடும் முத்துராமனுக்கு ஆறுதல் சொல்கிறார் விஜயா - அது அவரது குலதெய்வம் என்றும், உங்களை ஒன்றும் செய்யாது என்றும், நம்மளை ஆசீர்வதிக்க வந்துள்ளது என்றும் சொல்கிறார். அப்போது அவர் ஆறுதல் அடைந்தாலும், குற்றம் புரிந்த அவரால் பீதியிலிருந்து மீளமுடிவதில்லை. அதனால் நிழலில் ஆடும் இல்லை கூட அவருக்கு நாகம் படமெடுத்து ஆடுவது போல் தெரிகிறது. தன்னை அந்த நாகம் எப்படியும் பழி வாங்கியே அடங்கும் என்று நன்கு அறிந்த அவர் விஜயாவிடம் நடந்த உண்மையை சொல்லிவிடுகிறார்.

நாகதேவதையின் பரம பக்தையான விஜயாவின் மாங்கல்ய காப்பாற்றப்படுமா? இல்லை நாகம் முத்துராமனை பழி வாங்குகிறதா? ஜெயசித்ராவின் சபதம் நிறைவேறுகிறதா? இப்படிப்பட்ட பல கேள்விகளுக்கு படத்தின் மீதி கதை பதிலளிக்கிறது.

அட, இது என்னப்பா சாதாரண "filler song" தானே, அதற்க்கு போய் இப்படி விலாவாரியாக கதையை சொல்லவேண்டுமா என்று சலிப்போரும் இருக்கலாம். அதற்க்கு - பழக்க தோஷம் என்றோ, சரியான ரம்பம் என்றோ, அவனுக்கென்னப்பா பொழுது போகவில்லை தோணுது அதான் பக்கம் பக்கமாக எழுதி தள்ளுகிறான் என்றோ, இல்லை அது அவனது தனி பாணி என்றோ எப்படி வேண்டுமானாலும் நீங்களே தீருமானித்துக்கொள்ளுங்கள்.

ஜெயசித்ரா தகப்பனை இழந்து கழைக்கூத்தாடியான மனோரமா குடும்பத்தோடு சேர்ந்து வயித்துப்பிழைப்புக்காக அவரோடு சேர்ந்து ஆடிப்படுகிறார் என்று குறிப்பிட்டிருந்தேன் அல்லவா, அப்போது பாடப்படும் பாடல் தான் இந்த பாடல்.

Prelude - எல்.ஆர்.ஈஸ்வரியின் குரலில் "டர்ர்ர்ர்ர்................" என்று ஆரம்பிக்கிறது prelude. தொடர்ந்து "Dhol" அல்லது "Nagada"-வில் - அல்லது அது போன்ற ஒரு heavy percussion-னில் (ஒரு வேளை Drums ஆகக்கூட இருக்கலாம்) தாளம் ஒலிக்கிறது, அதோடு சேர்ந்து "சலங்கை"-யின் ஒலியும் சேர்ந்து ஒலிக்கிறது. தாளம் தொடர்ந்து ஒலித்துக்கொண்டிருக்க, Clarinet மற்றும் புல்லாங்குழல் சேர்ந்து ஒரு piece ஒலிக்கிறது. பிறகு அதை overlap செய்து Bells மற்றும் Mandolin-னில் ஒரு piece ஒலிக்கிறது. தொடர்ந்து Bells தனியாக ஒலிக்கிறது. அதை தழுவி Mandolin-னில் வேகமாக ஒரு piece. தொடர்வது சாய்பாபா குரலில் "ஹை காட்டு பத்திரி ......" என்ற கழைக்கூத்தாடி style ஹம்மிங். அதை தொடர்ந்து Clarinet-டில் ஒரு சிறு piece (கூடவே புல்லாங்குழலும் சேர்ந்துள்ளதா என ஒரு சந்தேகம்). அதை தழுவி Guitar chords + Combo Organ இவற்றில் ஒரு piece. அது முடிந்ததும் டோலக்கில் ஒரு roll . இந்த ஹம்மிங் ஆரம்பிக்கும் போது அங்கு "Dhol"/"Nagada" இவற்றோடு தபலா, டோலக் மற்றும் தவில்(!) சேர்ந்துகொள்கிறது.

Pallavi – மனோரமா குரலில் பல்லவி ஆரம்பிக்கிறது. அவர் பல்லவியின் மூன்று வரிகளை பாடுகிறார். இரண்டாவது வரி முடிந்ததும் ரொம்பவே சிறிய ஒரு இடைவெளி வருகிறது மூன்றாவது வரியை பாடுவதற்கு முன் - அந்த சிறிய gap-ப்பை Rabab-பில் (அல்லது Mandolin-னை Rabab போல் ஒலிக்க செய்துள்ளார்) ஒரு மிகச்சிறிய piece போட்டு நிரப்பியுள்ளார் - இதை மிகவும் கவனமாக கேட்டால் மட்டுமே புரிந்துகொள்ள முடியும். மூன்றாவது வரி முடிந்ததும் அதற்க்கு Rabab-பில் ஒரு interlude சேர்த்துள்ளார் (இதுவும் ஒருவேளை Mandolin ஆகக்கூட இருக்கலாம்). தொடர்ந்து மனோரமா அதே வரிகளை ஒரு முறை கூட பாடுகிறார். இங்கு இரண்டாவது வரி முடிந்ததும் அதற்க்கு புல்லாங்குழலில் ஒரு piece வாசித்து அழகு சேர்த்துள்ளார். அது போல மூன்றாவது வரி முடிந்த பிறகும் புல்லாங்குழலில் ஒரு interlude சேர்த்துள்ளார். தொடர்வது அனுபல்லவி - இங்கு எல்.ஆர்.ஈஸ்வரி அறிமுகமாகிறார் - அநுபலவியின் இரண்டு பல்லவியை பாடி அதை ஒரு முறை கூட பாடுகிறார். தொடர்ந்து அடுத்த வரியை பாடுகிறார். அதை மனோரமா வழிமொழிகிறார். அது முடிந்ததும் தபலா/டோலக்கில் ஒரு roll. தொடர்ந்து எல்.ஆர்.ஈஸ்வரி பல்லவியின் முதல் மூன்று வரிகளை பாடுகிறார் - அதற்க்கு இரண்டாவது வரி முடிந்த பிறந்து புல்லாங்குழலில் ஒரு interlude சேர்க்கப்பட்டுள்ளது. இந்த பகுதிக்கு தாளமாக தபலா மற்றும் டோலக் வாசிக்கப்பட்டுள்ளது, மேலும் மெருகூட்ட "சலங்கை" சேர்க்கப்பட்டுள்ளது.

First BGM – சாய்பாபாவின் குரலில் "காட்டு பத்திரி...." என்ற blabbering-ங்கோடு இந்த BGM ஆரம்பிக்கிறது. அவர் அதை ஒரு ஆலாபனை/ஹம்மிங்கோடு நிறைவு செய்கிறார். அந்த "ஓஹோஹோ...."வை பின்தொடர்ந்து Shehnai ஒலிக்கிறது. தொடர்வது ஒரு whistle அதை தொடர்ந்து Xylophone-னில் இரு roll. இது ஒரு முறை கூட தொடர்ந்து BGM நிறைவு பெறுகிறது. இந்த பகுதிக்கு "Dhol"/"Nagada", தபலா, டோலக் மற்றும் தவில் வாசிக்கப்பட்டுள்ளது. மேலும் மெருகூட்ட Guitar சோர்ட்ஸ் மற்றும் சலங்கை வாசிக்கப்பட்டுள்ளது.

First Charanam – எல்.ஆர்.ஈஸ்வரியின் குரலில் சரணம் ஆரம்பமாகிறது. முதல் இரண்டு வரிகளை அவர் பாடுகிறார்,அதற்க்கு Shehnai-யில் ஒரு சிறு interlude. தொடர்ந்து அதே வரிகளை அவர் பாடுகிறார். அது முடிந்ததும் மீண்டும் Shehnai-யில் ஒரு சிறு interlude. தொடர்வது அனுசரணம். இதை மனோரமா பாடுகிறார் - இரண்டு வரிகள் கொண்டது. இங்கு interlude ஏதும் கிடையாது. ஆனால் அதே வரிகளை மறுபடியும் பாடுவதற்கு முன் வரும் சிறு இடைவெளியை "தவில் beat" நிறைவு செய்கிறது. இரண்டாவது முறை பாடும் போது modulation சற்று மாறுபடுகிறது. தொடர்ந்து மனோரமா பல்லவியின் மூன்று வரிகளை புல்லாங்குழல் interlude சேர்த்து பாடி சரணம் முடிகிறது. சரணம் + அனுசரணம் பகுதிக்கு தவில் வித்தியாசமான தாளநடையில் off beat-டில் வாசிக்கப்பட்டுள்ளது. அனுசரணம் முடிந்து பல்லவி ஆரம்பிக்கும் முன் வரும் சிறு இடைவெளியை தபலா beat நிறைவு செய்கிறது.

Second BGM – Shehnai + புல்லாங்குழலில் ஒரு நீண்ட piece. அதை தொடர்ந்து Bells மற்றும் Mandolin-னில் ஒரு பீஸ். தொடர்வது comic effect-டோடு வயலின் piece - இந்த வயலின் piece BGM-ம்மை நிறைவு செய்கிறது. இந்த பகுதியில் தவில், Dhol / Nagada, தபலா மற்றும் டோலக் வாசிக்கப்பட்டுள்ளது. அத்தோடு சலங்கையும். தாளக்கருவிகள் அனைத்தும் Mandolin piece வரும்போது நின்றுவிடுகிறது.

Second Charanam – இந்த சரணத்தில் சிறு மாறுதல் வருத்தியுள்ளார். முதல் சரணத்தில் பாடியது போலவே இந்த சரணத்திலும் முதலில் எல்.ஆர்.ஈஸ்வரி பாடுகிறார். தொடர்ந்து வரும் பகுதியில் மாற்றம் செய்துள்ளார். இங்கும் மனோரமா அனுசரணத்தின் மூன்று வரிகளை பாடுகிறார் - மூன்றாவது வரியை பாடும் போது modulation மாறுபடுகிறது. அது முடிந்ததும் கன்னத்தில் பளார் என்று அறைகிறார் என்பதை சுட்டிக்காட்டும் பாணியில் தபாலாவில் பலமாக ஒரு தட்டல். தொடர்ந்து மனோரமாவின் குரலில் யாரையோ தாக்கீது செய்யும் பாணியில் "ம்ஹூம்" என்று ஒரு ஹம்மிங். தொடர்வது ஒரு silence. இத்தோடு இந்த சரணம் முடிகிறது - பல்லவியை பாடாமலேயே.

Third BGM – நான்கு முறை Mandolin + Bells-ஸில் சிறு pieces வாசிக்கப்படுகிறது - ஒவ்வொரு piece-ஸுக்கு பிறகும் டோலக்கில் ஒரு ரோல் வாசிக்கப்படுகிறது - like a relay. அதற்க்கு பிறகு "அபாய"த்தை சுட்டிக்காட்டும் வண்ணம் Drums வாசிக்கப்பட்டுள்ளது - Guitar chords சின் பலத்தோடு.

Third Charanam - இந்த சரணத்தில் மீண்டும் சில மாறுதல்கள். எல்.ஆர்.ஈஸ்வரி முதல் இரண்டு வரிகளை பாடுகிறார், அதற்க்கு Shehnai-யில் ஒரு interlude - இங்கு repetition ஏதும் கிடையாது. தொடர்ந்து அடுத்த இரண்டு வரிகளை (அனுசரணத்தை) மனோரமா பாடுகிறார். தொடர்ந்து எல்.ஆர்.ஈஸ்வரி "ஹேய் ஹேய்" என்று hum செய்து பல்லவியின் மூன்று வரிகளை பாடுகிறார் - அவரோடு இங்கு மனோரமாவுக்கு சேர்ந்து கொள்கிறார். இங்கு சாய்பாபா off-beat-டில் "ஹேய், ஹேய்" என்று hum செய்கிறார். பல்லவியின் வரிகளை பாடி இருவரும் (எல்.ஆர்.ஈஸ்வரி/மனோரமா) அப்படியே "காட்டு தத்திரி" என்று பாடி பாடலை நிறைவு செய்கின்றனர்.

டப்பாங்குத்து பாணி பாடல் தான் என்றாலும் தாளம் போட்டு ரசிக்கும் வண்ணம் அமைந்த அழகான மெட்டு.

மீண்டும் ஓர் அரிய / அற்புதமான பாடலுடன் உங்களை சந்திக்கும் வரை உங்களிடமிருந்து நன்றி மற்றும் வணக்கம் கூறி விடைபெற்றுக்கொள்வது,

உங்கள் அன்பன்,

ரமணன் கே.டி.

https://youtu.be/gt9AG4pSp4w


Quote
Share: